حيدربابا ، ايلديريملار شاخ آندا
    سئللر ، سولار ، شاققيلدييوب آخاندا
    قيزلار اونا صف باغلييوب باخاندا
    سلام اولسون شوكتوزه ، ائلوزه !
    منيم دا بير آديم گلسين ديلوزه
    
    
    حيدربابا ، كهليك لرون اوچاندا
    كول ديبينن دوشان قالخوب ، قاچاندا
    باخچالارون چيچكلنوب ، آچاندا
    بيزدن ده بير مومكون اولسا ياد ائله
    آچيلميان اوركلري شاد ائله
    
    
    بايرام يئلي چارداخلاري ييخاندا
    نوروز گولي ، قارچيچكي ، چيخاندا
    آغ بولوتلار كوينكلرين سيخاندا
    بيزدن ده بير ياد ائلييه ن ساغ اولسون
    دردلريميز قوي ديكلسين ، داغ اولسون
    
    
    حيدربابا ، گون دالووي داغلاسين !
    اوزون گولسون ، بولاخلارون آغلاسين !
    اوشاخلارون بير دسته گول باغلاسين !
    يئل گلنده ، وئر گتيرسين بويانا
    بلكه منيم ياتميش بختيم اويانا
    
    
    حيدربابا ، سنون اوزون آغ اولسون !
    دورت بير يانون بولاغ اولسون باغ اولسون !
    بيزدن سورا سنون باشون ساغ اولسون !
    دونيا قضوقدر ، اولوم ايتيمدي
    دونيا بويي اوغولسوزدي ، يئتيمدي
    
    
    حيدربابا ، يولوم سنن كج اولدي
    عومروم كئچدي ، گلممه ديم ، گئج اولدي
    هئچ بيلمه ديم گوزللرون نئج اولدي
    بيلمزيديم دونگه لر وار ، دونوم وار
    ايتگين ليك وار ، آيريليق وار ، اولوم وار
    
    
    حيدربابا ، ايگيت امك ايتيرمز
    عومور كئچر ، افسوس بره بيتيرمز
    نامرد اولان عومري باشا يئتيرمز
    بيزد ، واللاه ، اونوتماريق سيزلري
    گورنمسك حلال ائدون بيزلري
    
    
    حيدربابا ، قوري گولون قازلاري
    گديكلرين سازاخ چالان سازلاري
    كت كوشنين پاييزلاري ، يازلاري
    بير سينما پرده سي دير گوزومده
    تك اوتوروب ، سئير ائده رم اوزومده
    
    
    حيدربابا ، قره چمن جاداسي
    چووشلارين گلر سسي ، صداسي
    كربليا گئدنلرين قاداسي
    دوشسون بو آج يولسوزلارين گوزونه
    تمدونون اويدوخ يالان سوزونه
    
    
    حيدربابا ، شيطان بيزي آزديريب
    محبتي اوركلردن قازديريب
    قره گونون سرنوشتين يازديريب
    ساليب خلقي بيربيرينن جانينا
    باريشيغي بلشديريب قانينا
    
    
    گوز ياشينا باخان اولسا ، قان آخماز
    انسان اولان بئلينه تاخماز
    آمما حئييف كور توتدوغون بوراخماز
    بهشتيميز جهنم اولماقدادير !
    ذي حجه ميز محرم اولماقدادير !
    
    حيدربابا ، آغاجلارون اوجالدي
    آمما حئييف ، جوانلارون قوجالدي
    توخليلارون آريخلييب ، آجالدي
    كولگه دوندي ، گون باتدي ، قاش قرلدي
    قوردون گوزي قارانليقدا برلدي
    
    حيدربابا ، دونيا يالان دونيادي
    سليماننان ، نوحدان قالان دونيادي
    اوغول دوغان ، درده سالان دونيادي
    هر كيمسيه هر نه وئريب ، آليبدي
    افلاطوننان بير قوري آد قاليبدي
    
    
    حيدربابا گويلر بوتون دوماندي
    گونلريميز بيربيريندن ياماندي
    بيربيروزدن آيريلمايون ، آماندي
    ياخشيليغي اليميزدن آليبلار
    ياخشي بيزي يامان گونه ساليبلار
    
    
    حيدربابا ، مرد اوغوللار دوغگينان
    نامردلرين بورونلارين اوغگينان
    گديكلرده قوردلاري توت ، بوغگينان
    قوي قوزولار آيين شايين اوتلاسين
    قويونلارون قويروقلارين قاتلاسين
    
    حيدربابا ، سنون گويلون شاد اولسون
    دونيا واركن ، آغزون دولي داد اولسون
    سنن گئچن تانيش اولسون ، ياد اولسون
    دينه منيم شاعر اوغلوم شهريار
    بير عمر دور غم اوستونه غم قالار